اس ویب سائٹ کا مقصد جماعت اسلامی کراچی کے سابق امیر، سابق سٹی ناظم اور ملک کے ممتاز سماجی رہنما نعمت اللہ خان صاحب کی حیات و خدمات کو لوگوں تک پہنچانا ہے۔ ملک کے معروف صحافی اور فیچر رائٹر شبیر سومرو نے نعمت اللہ خان صاحب کے کئی انٹرویوز کر کے ان کی سوانح حیات مرتب کی تھی، جو ان کے بچپن سے سٹی نظامت تک کے واقعات پر مشتمل ہے۔ ویب سائٹ میں وہ کتاب ”ہجرت سے نظامت“ تک کے نام سے موجود ہے۔ پی ڈی ایف فائل بھی ڈاؤن لوڈ کی جاسکتی ہے۔ تصاویر اور وڈیوز کا اچھا خاصا ذخیرہ بھی اس پر اپ لوڈ کر دیا گیاہے۔ نعمت اللہ خان صاحب کے انتقال پرملال کے بعد مختلف اخبارات میں جو کالم شائع ہوئے اور ٹی وی چینلز پر جو پروگرامات نشرکیے گئے، ان کا کچھ حصہ بھی ویب سائٹ میں شامل کر دیا گیا ہے۔ 

نعمت اللہ خان جماعت اسلامی کے ان رہنماؤں میں شامل تھے جو طلبہ سیاست کے ذریعے جماعت سے متعارف نہیں ہوئے تھے۔ خان صاحب مولانا مودودیؒ کی کتب پڑھ کر اور کچھ لوگوں کے رابطوں کی وجہ سے جماعت کی دعوت اور نظریے سے متاثر ہوئے تھے۔ جماعت میں باقاعدہ کارکن بننے کا دور 1970ء میں شروع ہوا، گو کہ وہ پچاس اور ساٹھ کی دہائی میں بھی جماعت کے کچھ افراد کے رابطے میں آئے تھے۔ خان صاحب نے 1974ء میں 44 سال کی عمر میں رکنیت کا حلف اٹھایا۔ پھر آخری سانس تک اس حلف کی پاسداری کی۔

نعمت اللہ خان اول تا آخر جماعت اسلامی کے رکن اور ذمہ دار تھے اور جماعت ہی ان کی ذات کا حوالہ اور شناخت تھی لیکن وہ ایک عوامی آدمی اور خادم خلق بھی تھے۔ ان کی خدمات کا دائرہ بہت وسیع تھا۔ صحرائے تھر سے شمالی علاقوں کے پہاڑوں تک پھیلا ہوا۔ انہوں نے خدمت کے معاملے میں کبھی کسی قسم کی تفریق کو اہمیت نہیں دی اور تمام انسانوں کو ”اللہ کے بندے“ سمجھا۔ ان سے محبت کی، ان کے سر پر دست شفقت رکھا، ان کے دکھوں کا مداوا کرنے کی ہر ممکن کوشش کی۔ اللہ تعالیٰ ہمیں بھی ان کے نقش قدم پر چلنے کی توفیق عطا فرمائے اور ان کی یادوں کے چراغوں کی روشنی کو پھیلانے کی توفیق بخشے، آمین

اس ویب سائٹ کو مزید بہتر بنانے کے لیے دی جانے والی تجاویز کا خیر مقدم کیا جائے گا۔ اگر کسی کے پاس نعمت اللہ خان صاحب کی کوئی یادگار تصویر ہو، تو براہ کرم ای میل کردیں، بھیجنے والے کے نام اور شکریے کے ساتھ ویب سائٹ میں شامل کرلی جائے گی۔

ڈاکٹر فیاض عالم